గమనించము కానీ

గమనించము కానీ

గాఢమైన నిద్రనుండి మేల్కొన్నపుడు కూడా

మనచుట్టూ ఉన్న ప్రపంచం అప్పుడే పుట్టినట్లుంటుంది

ఆ క్షణమే ఎవరో ప్రపంచాన్ని తెచ్చి పరిచినట్లుంటుంది

అప్పుడు, తాజాగాలులు మొదటి శ్వాసలా దేహంనిండా వ్యాపిస్తాయి

గమనించము కానీ

దీర్ఘ ప్రవాసం తరువాత ఇల్లు చేరినపుడు

ఇల్లు కూడా కాసేపు మానని అతిథిలా చూస్తుంది

ఇంటిగోడలూ, వెలిసిన రంగులూ, ఇంటిలోని వస్తువులూ

ఇవాళ వాకిట్లో పూసిన పూలూ, మన మనుషుల మాటలూ

ఎవరీ మనిషని చూస్తున్నట్లూ, ఎవరినో పలకరిస్తున్నట్లూ ఉంటాయి

గమనించము కానీ

ఇల్లూ, మెలకువా పాతబడే కొద్దీ

నెమ్మదిగా మనవాళ్లూ, ప్రపంచమూ మనలో నిండే కొద్దీ

దేనినో కోల్పోతున్న దిగులొకటి

ఇసుకపొరలు దాటుకొంటూ వాననీరు పాతాళంలోకి ఇంకుతున్నట్లు

మనలోకి ఇంకుతూ ఉంటుంది!

రచన: బివివి ప్రసాద్ 

by Kathala Express December 05, 2017 0 comments