రంగుల పరిచయం

రంగులెపుడు తొలిసారి పరిచయమయ్యాయో జ్ఞాపకముందా?

బొమ్మలపైనా, అమ్మ చీరలపైనా, పూలపైనా, మేఘాలపైనా

రంగులెలా తొలిసారి ఆశ్చర్యపరిచాయో స్మృతులు మిగిలాయా?

పసుపూ, ఎరుపూ, నీలం, తెలుపూ, నలుపుల వేల ఆటలు

పేర్లతో అలవాటుపడక ముందు ఏ రహస్యలోకాల సందడి చేశాయో గుర్తుందా?

ఇంకా అపుడపుడూ విస్మయపరుస్తాయి రంగులు నన్ను

వ్యాకులతలూ, భయాలూ చీకటిలా ముసిరినపుడు బాల్యస్నేహితుల్లా సేదదీరుతాయి

ముకుళించటం మృత్యువు, వికసించటం జీవితమని వెన్నుతడతాయి

దైవానికి దయలేదనీ, ఆయనకు మాటలు రావనీ ఎవరైనా అన్నప్పుడల్లా

వెలుతురూ ఆయన దయ అనీ, రంగులు ప్రేమభాషణ అనీ చెప్పాలనిపిస్తుంది

రంగులు వెలిసిపోవటం ఎపుడు మొదలయిందో వెనుదిరిగి చూసావా?

చిన్ననాటి పుస్తకాలతో పాటు దాచుకున్న నెమలీకనీ జీవితంలోంచి విసిరేసిన క్షణాలలో

మనలోంచి మాయమైన అమాయకత్వాన్ని ఎప్పుడైనా తడుముకున్నావా?

తెల్లని కాంతీ, కాంతి నుండి ఎగిరే రంగులపక్షులూ ఎటు వెళ్లిపోయాయో,

కాంక్షలమేఘాలతో జీవితమెలా మాసిపోయిందో ఎపుడైనా బాల్యాన్నడిగి తెలుసుకున్నావా? 

రచన: బివివి ప్రసాద్

by Kathala Express December 05, 2017 0 comments