నీలో కొన్నిసార్లు!

నీలో కొన్నిసార్లు ఉత్సవముంటుంది!

అప్పుడు నీకందర్నీ పలకరించాలనిపిస్తుంది

పూలతో, పిట్టలతో,దారినపోయే మనుషులతో తోచిన మాటలన్నీ మాట్లాడాలనిపిస్తుంది

దుఃఖంచే నేత్రాలపై మృదువుగా ముద్దులు పెట్టాలనిపిస్తుంది

ఎవరేమనుకుంటే ఏమిటని వచ్చీరాని పాటలన్నీ పాడాలనిపిస్తుంది

దేహాన్నోక కెరటం చేసి నర్తించాలనీ,

నలుగురు పిల్లల్ని పోగుచేసి పరుగుపందెంలో వాళ్ళతో ఓడిపోవాలనీ అనిపిస్తుంది

నీలో కొన్నిసార్లు నిరాశ ఉంటుంది!

అప్పుడు ప్రకాశిస్తున్న ఎండలోకి ఎవరో చీకటిని ఓంపుతున్నట్లుంటుంది

కనిపించని తలుపులన్నీ మూసుకుంటూ లోలోపలికి వెళ్లిపోవాలనిపిస్తుంది

గండశిలవంటి కాలాన్ని పగులగొట్టి దిగంతాలకు విసిరివేయాలనిపిస్తుంది

తెలియని ఉప్పెన ఎదో నలువైపుల నుండీ ముంచేస్తున్నట్లుంటుంది

విసుగువేరు తొలుచుకుంటూ వెళ్లి నిన్ను పూర్తిగా ఖాళీ చేసుకోవాలనిపిస్తుంది

నీలో కొన్నిసార్లు కోరికల సమూహాలుంటాయి!

నీ ఇంద్రియాలు వికసించి లోకాన్నొక దాహకమై కమ్మేయాలనిపిస్తుంది

చూసినవన్నీ కోరక ముందే సొంతం అయిపోవాలనిపిస్తుంది

ప్రపంచం నీ ముందు మోకరిల్లి నిన్ను కీర్తించాలనిపిస్తుంది

మృత్యువుకే నిన్ను చూస్తే భయం వేయాలనిపిస్తుంది

నీలో కొన్నిసార్లు భయముంటుంది!

రాత్రి వచ్చిన కల చివర ఊహకందని శక్తి ఏదో ఎత్తుకుపోయినట్లుంటుంది

నిన్ను నొక్కిపెడుతున్న ఎవరినో శక్తికొద్దీ విసిరేయాలనిపిస్తుంది

రానీ, చూసుకుందామనే మొండిధైర్యంలోకి పూర్తిగా దూకేయాలనిపిస్తుంది. 

ప్రపంచాన్ని కూర్చోబెట్టి గబగబా పాఠాలు చెప్పేయాలనిపిస్తుంది

నీలో కొన్నిసార్లు నిష్కపటమైన దయ ఉంటుంది!

గాయపడ్డ ప్రాణాలన్నిటినీ దగ్గరగా హత్తుకోవాలనిపిస్తుంది

లోకం చేసిన గాయాలన్నీ పోనీలే అని మరిచిపోవాలనిపిస్తుంది

ప్రపంచాన్ని పసిబిడ్డను చేసి ఎత్తుకోవాలనిపిస్తుంది

అప్పుడు నీకు జీవితం మీద  జీవితమంత ప్రేమ పుడుతుంది

నీలో కొన్నిసార్లు అరుదుగా మౌనం ఉంటుంది!

ప్రపంచాన్ని చూసి ఒకే ఒక్క పసినవ్వు నవ్వాలనిపిస్తుంది

రాలినపూవు నేలని తాకిన చప్పుడు నీలో కోమలంగా కరిగిపోయినట్లుంటుంది

సూర్యోదయాన్ని దోసిలిలో ఒంపుకుని సుతారంగా త్రాగినట్లుంటుంది

ఆకాశం పక్షిరెక్కయి శాంతిలోకి ఎగురుతున్నట్లుంటుంది

అప్పుడు, ఒకసారి జీవితాన్ని నిజంగా జీవిస్తున్నట్లుంటుంది

రచన: బివివి ప్రసాద్

by Kathala Express December 04, 2017 0 comments